டீ கடை பெஞ்ச்

பதிவு செய்த நாள் : ஆக 16, 2018
Advertisement
டீ கடை பெஞ்ச்


ஆபாச அர்ச்சனை அதிகாரி மீது நடவடிக்கை வருமா?

''லெட்டர் பேடு சங்கங்களை கணக்கெடுத்துண்டு இருக்கா ஓய்...'' என்றவாறே, பெஞ்சில் அமர்ந்தார் குப்பண்ணா.''எதுக்கு பா...'' எனக் கேட்டார் அன்வர்பாய்.''காவிரி மேலாண்மை ஆணையத்தை, மத்திய அரசு அமைச்சுடுத்து... கர்நாடகாவுலயும் பலமா மழை பெஞ்சு, காவிரியில, போதும் போதும்கற அளவு ஜலத்தை திறந்து விட்டுட்டா... ''காவிரி ஜலம் ஓடற வழித்தடங்கள்ல, பொதுப்பணித் துறை மூலமா, புனரமைப்பு பணிகள் நடக்கறது... இதை செய்யற கான்ட்ராக்டர்களை மிரட்டி, பணம் பறிக்கற முயற்சியில, சில லெட்டர் பேடு விவசாய சங்கங்கள் இறங்கியிருக்கு ஓய்...''அதோட, வெண்ணாறு, கொள்ளிடம் ஆறுகள்ல தடுப்பணை கட்டணும்னு போராட்டம் நடத்த, அப்பாவி விவசாயிகளை, சில சங்கங்கள் துாண்டிண்டு இருக்கு... இவாளை தான், உளவுத் துறை கணக்கெடுத்துண்டு இருக்கு ஓய்...'' என்றார் குப்பண்ணா.''தனித்தனியா போங்கன்னு உத்தரவு போட்டிருக்காருங்க...'' என, அடுத்த மேட்டருக்கு சென்றார் அந்தோணிசாமி.''எங்க வே தனித்தனியா போகணுமாம்...'' எனக் கேட்டார் அண்ணாச்சி.''கருணாநிதி சமாதியில, தினமும் நிறைய பேர், அஞ்சலி செலுத்திட்டு இருக்காங்க... 'சமாதிக்கு வர்ற தொண்டர்கள் கூட்டம் குறையாம இருக்கணும்'னு, மாவட்ட நிர்வாகிகளுக்கு, தலைமை உத்தரவு போட்டிருக்குங்க... ''திருவள்ளூர் வடக்கு மாவட்டச் செயலர், கும்மிடிப்பூண்டி, வேணு, நகரம், பேரூர் மற்றும் ஒன்றிய செயலர்களை கூப்பிட்டு பேசியிருக்கார்... ''அப்ப, 'ஒரே நாள்ல எல்லாரும் போய் அஞ்சலி செலுத்த வேண்டாம்... ஒவ்வொரு நாளும், ஒவ்வொரு ஒன்றியம், நகர, கிளை நிர்வாகிகள், குறைஞ்சது, 150 தொண்டர்களோட பஸ், வேன் ஏற்பாடு பண்ணி, அஞ்சலி செலுத்த போங்க'ன்னு சொல்லிட்டாருங்க... ''இதனால, 'வேன் வாடகை, தொண்டர்கள் சாப்பாடுன்னு நிறைய செலவு ஆகுமே'ன்னு நிர்வாகிகள் பீதியில இருக்காங்க...'' என்றார் அந்தோணிசாமி.''காஞ்சிபுரம் மாவட்டம், அச்சிறுப்பாக்கம் வட்டார வளர்ச்சி அலுவலக அதிகாரி ஒருத்தருக்கு, 50 வயசுக்கு மேல ஆவுது... ஆனா, வயசுக்கு ஏத்த மாதிரி பேச்சு இல்லை வே...'' என, கடைசி மேட்டருக்கு வந்த அண்ணாச்சியே தொடர்ந்தார்... ''அதிகாரி, தனக்கு கீழ வேலை பார்க்குறவங்களிடம், ஆபாச வார்த்தைகள்ல தான் பேசுதாரு... சமீபத்துல, ஒரு ஊராட்சி செயலர்ட்ட போன்ல பேசுறப்ப, காதே கேட்க முடியாத அளவுக்கு அவரை அர்ச்சனை செஞ்சாரு வே...''அதோட, 'எனக்கு அரசியல், ஜாதி செல்வாக்கு இருக்கு... உயர் அதிகாரிகள், என்னை ஒண்ணும் பண்ண முடியாது... உடம்புல உயிரை மட்டும் விட்டுட்டு, கை, காலை எடுத்துடுவேன்'னு மிரட்டியிருக்காரு வே... ''அதிகாரியின் பேச்சு, சமூக வலைதளங்கள்ல பரவிட்டு இருக்கு... அவர் மேல, கலெக்டர் என்ன நடவடிக்கை எடுக்க போறார்னு, மாவட்ட அரசு ஊழியர்கள் எதிர்பார்த்துட்டு இருக்காவ வே...'' என்றார் அண்ணாச்சி.''லோகநாதன் சாயந்தரம் வீட்டு பக்கம் வா பா... முக்கிய விஷயம் பேசணும்...'' என, நண்பரிடம் கூறியபடி அன்வர்பாய் கிளம்ப, மற்றவர்களும் எழுந்தனர்.

Advertisement

இதையும் தவறாமல் படிங்க ...



Advertisement

வாசகர் கருத்து

முதல் நபராக கருத்து தெரிவியுங்கள்!

உங்கள் கருத்தைப் பதிவு செய்ய

(Press Ctrl+g or click this   to toggle between English and Tamil)
Login :
New to Dinamalar ?
கருத்து விதிமுறை


We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X